O domingo 18 de decembro falecía na cidade de Ourense, despois dunha longa enfermidade, o antropólogo Xosé Antón Fidalgo Santamariña.
Fidalgo, como era coñecido por todos, levaba desde mediados da década de 1970 afincado na cidade de Ourense, onde empezou dando aulas no vello Colexio Universitario, despois convertido en campus da Universidade de Vigo. Nativo das terras de Sobrado, sería aquí, nos lindes entre as provincias da Coruña e Lugo, onde empezou facendo traballo de campo para elaborar a súa tese de doutoramento. O resultado foi a monografía Antropología de una parroquia rural (1988) sobre unha parroquia do concello de Friol e polo que recibiu o premio Otero Pedrayo. Mais diste traballo de campo saíron diversos artigos relacionados especialmente coas prácticas curativas no mundo rural ou cos traballos colectivos, gañando tamén o premio Vicente Risco de Etnografía.
A súa longa vinculación con Ourense tiña que deixar pegada nas súas investigacións. Así os oficios ambulantes propios destas terras ou a Festa do Pulpo do Carballiño foron temas sobre os que lanzou a súa ollada antropolóxica, xunto a outros como o patrimonio, a alimentación, o Entroido, etc.
A súa inserción en Ourense levouno a mergullarse plenamente na vida social da cidade. Así estivo durante moitos anos na vicepresidencia do Ateneo ourensán e, despois, na presidencia. Foi fundador e director do Laboratorio Ourensán de Antropoloxía Social e director da UNED. Tamén era membro do Padroado do Museo do Pobo Galego ou da European Association of Social Anthropologist (EASA) e formara parte da fenecida Ponencia de Antropoloxía do Consello da Cultura Galega.
Na nosa memoria quedará sempre o seu continuo sorriso.